O Concello de Frades informa da apertura do prazo de inscrición nos campamentos e actividades para a mocidade incluídas na campaña "Acción de Verán 2013", convocada pola Dirección Xeral de Xuventude e Voluntariado da Xunta de Galicia. Esta campaña, cuxas bases podes consultar no DOG, ofrece aos mozos e mozas nacidos entre 1995 e 2004 a posibilidade de participar en actividades de carácter lúdico, cultural, deportivo e formativo durante os meses de xullo e agosto de 2013 tanto en Galicia como noutras comunidades autónomas. Podes presentar a túa solicitude ou obter máis información na Oficina de Información Xuvenil do Concello de Frades (981 69 55 67) antes do próximo 16 de abril.

O Concello de Frades convoca axudas para transporte escolar e para a compra de material escolar para o curso académico 2012-2013 dirixidas ás familias máis necesitadas do municipio, que terán ata o vindeiro 26 de abril para presentar as súas correspondentes solicitudes. A subvención para transporte escolar está dirixida a alumnos e alumnas de Bacharelato ou de Formación Profesional (Grado Medio); mentres que as axudas para a compra de material escolar están dirixidas a alumnos e alumnas de Primaria e Secundaria.

O Concello de Frades informa a todos os pais e nais con fillos nacidos entre o 2/1/2010 e o 1/1/2013 de que a Xunta de Galicia abre o prazo para a presentación de solicitudes por fillo a cargo. A prestación consistirá nunha axuda de pago único que ascende a 360 euros e está dirixida a familias nas que, por razóns de ingresos obtidos durante o ano 2011, ningún membro da unidade familiar estivese obrigado a presentar Declaración da Renda nin a tivesen presentado de xeito voluntario aínda sen estar obrigado. O prazo de presentación de solicitudes remata o próximo 9 de maio.