Versión en castellano
Inicio Novas A Xunta inicia un proxecto dotado con 500.000 euros para o abastecemento de auga potable a dúas parroquias de Frades
A Xunta inicia un proxecto dotado con 500.000 euros para o abastecemento de auga potable a dúas parroquias de Frades
Sábado, 17 Novembro 2018 00:00

ovidiofradesO delegado territorial da Xunta de Galicia na Coruña, Ovidio Rodeiro, acompañado polo alcalde de Frades, Roberto Rey, visitou o inicio das obras de abastecemento de auga ás parroquias fradesas de Moar e Añá, que foron adxudicadas por un total de 497.890 euros pola entidade pública empresarial Augas de Galicia da Consellería de Infraestruturas e Mobilidade.


Este proxecto, que ten un prazo de execución de oito meses, permitirá dotar de auga potable a todas as vivendas destas dúas parroquias. Para isto, será necesario o soterramento de 21.385 metros de tubaxe de PVC de diverso diámetro, dende os 160 milímetros ata os 63. A obra contará tamén con tres cruces en estradas provinciais mediante perforacións verticais.

 

Na visita, Ovidio Rodeiro destacou “o esforzo conxunto das administracións autonómica e local por dotar ao rural de servicios básicos como o abastecemento de auga potable, que redunda nunha maior calidade de vida do veciños e veciñas”. O delegado territorial tamén recordou que esta actuación permitirá “garantir un maior control sanitario na auga de consumo humano, xa que ata o de agora as vivendas destas dúas parroquias fornecíanse con pozos e traídas particulares”.

 

Este proxecto está enmarcado no Plan de Abastecemento de Galicia incluído na Lei de Augas de Galicia, que ten como obxectivos garantir o abastecemento de auga potable a todos os núcleos de poboación superiores a 50 habitantes. Ademais, o plan tamén aposta por planificar as infraestruturas de captación, regulación, transporte, tratamento e distribución necesarias para garantir a subministración mesmo en períodos de seca.